Heimilisleg símaskrá

Eitt af því fyrsta sem ég gerði þegar til Namibíu var komið, var að glugga í símaskrána. Hún er nú mjög heimilisleg, rétt eins og íslenska símaskráin okkar, og er heilar 584 síður fyrir landið allt. Hér búa um 2 milljónir manna, en margir eru fátækir og því er símaeign ekki eins víðtæk og á Vesturlöndum. Hins vegar hefur farsímaeign aukist mikið, en það eru margir sem telja að farsímavæðing muni skipta miklu máli fyrir samskipti í þróunarlöndum í náinni framtíð, þar sem þau geti sleppt landlínulögnum og þeim kostnaði sem þeim er samfara.

Namibíska símaskráin er hin merkilegasta og er þar m.a. að finna leiðbeiningar um hvernig eigi að hringja erlendis, og þ.a.m. til Íslands. Eru þar nokkrir bæir listaðir og má þar m.a. finna Flatyri, Hverageroi, Kaflavik, Sucoavik og Reykyavik. Stafsetningin hefur eitthvað skolast til, en það kemur vonandi ekki að sök ef einhver fær áhuga fyrir að hringja til eyjunnar uppi í norðurhafi.

Athugasemdir

[Harpa Rut (IP-tala skráð) 10.2.2009 kl. 23:36]

Snilld. Náttlega örugglega fullt af Namibíubúum (ætlaði að segja Namöpum) sem þurfa að hringja á Súðavík og Flateyri og eins gott að tilgreina þá bæi sérstaklega þar sem landið er eitt símasvæði. Þeir fá mörg prik frá mér fyrir að eyða plássi í símaskránni í að reyna í það minnsta að gefa þessum bæjum pláss.

[Erla perla (IP-tala skráð) 12.2.2009 kl. 14:13]

Já, þetta er kannski bara rökrétt afleiðing af þróunarsamvinnu landanna. Ísland byrjaði sitt starf hér árið 1990 og hvergi í Afríku hafa jafn margir Íslendingar búið í gegnum tíðina, og þar af margir úr sjávarútvegsgeiranum (kannski tenging við Flateyri?). Þetta er alveg snilld hjá þeim.